Jihar Kebbi Za Ta Biya Kudin Makaranta Naira Miliyan 585 Ga Dalibanta Da Ke Indiya

Gwamnan Jihar Kebbi, Kwamared Nasir Idris, ya amince da fitar da Naira miliyan 585 domin biyan kudin karatu na ‘yan asalin jihar 100 da ke karatu a jami’o’i daban-daban na kasar Indiya.

Kwamishinan ilimi mai zurfi na jihar Isa Abubakar Tunga, wanda ya bayyana hakan a lokacin da yake zantawa da manema labarai, ya bayyana cewa hakan na daga cikin kokarin gwamnan jihar na bunkasa ilimi da kyawawan dabi’u a makarantun gaba da sakandare.

Ya bayyana cewa, nan ba da dadewa ba gwamnatin jihar za ta bai  wa daliban da ke karatu a Masar kudaden tallafin karatu saboda suna karkashin kulawar tallafin karatu na na kasar Misra.

Abdullahi Tukur