Tinubu Ya Nada Gwamna Uba Sani Jakadan Shirin Renewed Hope

Daga Bello Wakili 

Shugaban kasa Bola Ahmed Tinubu ya amince da nadin Gwamnan Jihar Kaduna Sanata Uba Sani, a matsayin jakadan shirin sabunta kudurori na Renewed Hope kuma mataimakin darakta mai kula da ayyukan jam’iyya da wayar da kai.

Sanarwan hakan ta fito ne daga Fadar shugaban kasa inda ta ce an yi nadin ne bisa la’akari da shugabanci nagari da gwamna Uba Sani ke gudanarwa.

Shugaban kasa Tinubu a matsayinsa na shugaban jam’iyyar APC, ya bukaci gwamnan Kaduna ya taimakawa jam’iyyar wurin wayar da kai da bullo da tsare-tsare a kasa baki daya.

Sanarwan ta ce a matsayinsa na jakadan shirin sabunta kudurori kuma mataimakin darakta, ana sa ran zai kasance kafada-da-kafada da darakta janar na jakadan shirin sabunta kudurori da shugabanin jam’iyyar APC musamman shugaban jam’iyyar APC na kasa, wurin bunkasa dama da daidaito da tsare-tsare a tsakanin ‘ya’yan jam’iyyar a kowane mataki.