Tinubu Ya Yi Jimamin Rasuwar Bamanga Tukur

Daga Bello Wakili 

Shugaban Ƙasa Bola Ahmed Tinubu ya bayyana alhininsa kan rasuwar dattijo, ɗan kasuwa kuma tsohon Gwamnan tsohuwar Jihar Gongola, Alhaji Bamanga Muhammad Tukur, wanda ya rasu yana da shekaru 90.

Shugaban ya bayyana rasuwar Tafidan Adamawa a matsayin ƙarshen wani muhimmin babi a tarihin siyasa da tattalin arzikin Najeriya.

An haifi Alhaji Tukur a ranar 15 ga Satumba, 1935, kuma ya taɓa zama Babban Manajan Hukumar Tashoshin Jiragen Ruwa ta Najeriya daga 1975 zuwa 1982. Daga bisani ya shiga siyasa a lokacin Jamhuriya ta Biyu, inda aka zaɓe shi Gwamnan tsohuwar Jihar Gongola, wadda yanzu ta ƙunshi jihohin Adamawa da Taraba, a shekarar 1983.

Marigayin ya kuma shugabanci kamfanonin BHI Holdings da DADDO Group of Companies, sannan ya riƙe muƙamin Ministan Masana’antu na Tarayya daga 1993 zuwa 1995 a lokacin mulkin Janar Sani Abacha.

A matakin Afirka, Bamanga Tukur ya kasance Shugaban Zartarwa na African Business Roundtable da kuma Shugaban NEPAD Business Group, inda ya yi fafutukar bunƙasa kasuwanci tsakanin ƙasashen Afirka da haɓaka tattalin arziki ta hanyar kamfanoni masu zaman kansu.

Babanga Tukur ya kuma kasance Shugaban Jam’iyyar PDP na ƙasa daga watan Maris na 2012 zuwa Janairun 2014.

Shugaba Tinubu ya bayyana shi a matsayin mutum mai karamci da mutunci, wanda ya yi imani da makomar Najeriya, yana mai cewa ƙasar za ta yi matuƙar kewar shawarwarinsa da jagorancinsa.

Shugaban ya mika ta’aziyyarsa ga iyalan marigayin, Masarautar Fombina, Gwamnati da al’ummar Jihar Adamawa, da kuma bangaren siyasa da kasuwanci a Najeriya da Afirka. Ya roƙi Allah Ya gafarta wa marigayin kura-kuransa, Ya sanya shi a Aljannar Firdausi.

Fassara; Safiyah Abdulkadir