Jigawa Ta Ware Naira Miliyan 380 Don Samar da Wutar Lantarki a Cibiyoyin ICT

Daga Usman Muhammad Zaria 

Majalisar Zartarwa ta Jihar Jigawa ta amince da kashe sama da naira miliyan 380 wajen samarwa da girka na’urorin samar da wutar lantarki ta hasken rana a cibiyoyin Fasahar Sadarwa (ICT) da ke faɗin jihar.

Kwamishinan Yaɗa Labarai na jihar, Alhaji Sagir Musa Ahmed ne ya bayyana hakan yayin da yake yi wa manema labarai bayani kan matakin da majalisar ta ɗauka.

Ya bayyana cewa aikin zai shafi cibiyoyin ICT da ke Marke, Auyo, Dutse, Kazaure, Lafiya Guri, Madobi Dutse, Malam Madori, Danzomo da Sule Tankarkar.

Sauran wuraren sun haɗa da Kaugama, Kafin Hausa, Garki, Miga, Birnin Kudu, Ringim, Bulangu da Kanya Babba da ke ƙaramar hukumar Babura, baya ga sauran wuraren da aka ware a cikin kwangilar.

A cewar kwamishinan, shirin na daga cikin ƙoƙarin gwamnatin jihar na samar da ingantacciyar wutar lantarki mai ɗorewa ga cibiyoyin ICT, rage dogaro da hanyoyin samar da wutar lantarki da aka saba, da inganta ayyukan fasahar zamani.

Ya ce ana sa ran girka na’urorin samar da wutar lantarki mai amfani da hasken rana zai inganta gudanar da ayyukan cibiyoyin, rage tsaikon da ake samu sakamakon katsewar wutar lantarki da samar da yanayi mai kyau don koyon dabarun amfani da fasahar zamani, koyon sana’o’i da ƙarfafa matasa.

Alhaji Sagir ya ƙara da cewa aikin zai taimaka wajen gudanar da horarwa kan fasahar ICT da sauran ayyukan koyon ilimin fasaha, ta yadda jama’a, musamman matasa, za su samu damar koyon muhimman dabarun amfani da fasahar zamani.

Fassara: Safiyah Abdulkadir