Jigawa Ta Amince Da Kwangilolin Sama Da Naira Biliyan 1.3

Daga Usman Muhammad Zaria 

Gwamnatin Jihar Jigawa ta amince da bayar da kwangilolin da darajarsu ta haura naira biliyan 1.3, domin ingantawa da faɗaɗa kayayyakin aiki a kafafen yaɗa labarai a jihar.

Kwamishinan Yaɗa Labarai na jihar, Alhaji Sagir Musa Ahmed, ya ce kwangilolin sun haɗa da girka na’urar watsa shirye-shirye ta Harris Digital AM mai ƙarfin 50KW ga gidan rediyon Jigawa, da kuma na’urorin FM masu ƙarfin 3KW guda biyar.

Ya ce, za a kuma gina kananan tashoshin FM guda biyar a ƙananan hukumomin Gumel, Gwaram, Hadejia, Kazaure da Ringim.

Kwamishinan ya ce ayyukan za su taimaka wajen faɗaɗa samun tashoshin rediyo tare da inganta watsa shirye-shirye ta hanyar  amfani da na’urar zamani.

Alhaji Sagir Musa Ahmed ya ƙara da cewa Majalisar Zartarwar jihar ta kuma amince da Ma’aikatar Lafiya ta rattaba hannu kan yarjejeniyar fahimtar juna da Malaria Consortium ƙarƙashin shirin SARMAAN II, da tallafin Gidauniyar Bill & Melinda Gates.

Ya ce haɗin gwiwar na tsawon shekaru huɗu zai taimaka wajen rage cutar zazzabin cizon sauro ta hanyar ba da tallafin fasaha, inganta amfani da bayanai da ƙarfafa samar da matakan kariya da maganin cutar ga al’umma da cibiyoyin lafiya.

Fassara : Safiyah Abdulkadir