Sauye-sauyen Da Tinubu Ya Samar Ya Haifar Da Cigaba A Jihohi – Namadi

Daga Usman Muhammad Zaria 

Gwamnan Jihar Jigawa, Malam Umar Namadi, ya yaba wa Shugaba Bola Ahmed Tinubu kan matakan da ya dauka domin amfanin kasa, musamman cire tallafin man fetur da daidaita farashin canjin kudade.

Gwamnan ya bayyana hakan ne yayin da yake karbar tawagar kungiyar PBAT Door-to-Door Movement, karkashin jagorancin shugaban kamfanin tsaro mai zaman kansa na Tantita Security Services Nigeria, Mista Kestin Ebimorbowei Pondi, a Dutse.

Tawagar ta je Jigawa ne domin kaddamar da reshen kamfanin a jihar, tare da gabatar da motocin yakin neman zabe guda 31 da za su taimaka wajen wayar da kan jama’a gabanin babban zaben 2027.

Namadi ya ce sauye-sauyen da gwamnatin tarayya ta aiwatar sun kara kudaden da gwamnatocin jihohi ke samu. A cewarsa, hakan ya taimaka wajen biyan albashi da fansho, da kuma aiwatar da ayyukan raya kasa.

Sai dai ya jaddada cewa ya kamata karin kudaden su haifar da sauye-sauye masu amfani ga jama’a, ciki har da samar da ayyukan yi, inganta samar da abinci, gina ababen more rayuwa da bude karin damammaki.

Gwamnan ya bayyana Tinubu a matsayin dan kishin kasa, a don haka ya bukaci tawagar ta kara tuntubar jama’a, domin mutane da dama ba su fahimci manufofi da nasarorin gwamnati yadda ya kamata ba.

Ya ce tattaunawa kai tsaye da masu zabe, da kuma sauraron matsalolinsu da bayyana ayyukan gwamnati na da muhimmanci wajen kara fahimta da goyon baya.

Namadi ya tuna da ziyarar da Tinubu ya kai Jigawa a baya-bayan nan, yana mai cewa kyakkyawar tarbar da jama’a suka yi masa ta nuna goyon bayansu ga shugabancinsa.

Ya tabbatar wa tawagar cewa gwamnatin jihar za ta ba kungiyar hadin kai domin samun nasarar Tinubu da sauran ‘yan takarar APC a zaben 2027.

A nasa bangaren, Pondi ya ce kungiyar za ta rika isar da manufofin gwamnati ga jama’a ta hanyar ziyartar gidaje da al’ummomi, tare da sauraron korafe-korafensu.

Ya bayyana cewa motocin 31 suna dauke da na’urorin magana, janareto, amsakuwa da makirufo. Ya kara da cewa kungiyar ta riga ta ziyarci kusan jihohi 23 a wani shirin wayar da kan jama’a na kasa baki daya.

Fassara: Safiyah Abdulkadir