Jigawa Ta Ware Sama Da Naira Biliyan 1 Ga Ayyukan Samar Da Ruwa

Daga Usman Muhammad Zaria 

Gwamnatin Jihar Jigawa ta amince da kashe naira biliyan 1.116 domin gudanar da ayyukan samar da ruwan sha a mazaɓu 23 na jihar, ƙarƙashin ayyukan mazabu na shekarar 2026 na Majalisar Dokokin jihar.

Kwamishinan Yaɗa Labarai na jihar, Alhaji Sagir Musa Ahmed ne ya bayyana hakan bayan kammala taron majalisar zartarwa ta jihar a gidan gwamnati da ke Dutse.

Ya ce an ware naira miliyan 907 domin ayyukan da Hukumar Samar da Ruwa da Tsaftar Muhalli ta Ƙauyuka (RUWASA) za ta aiwatar, yayin da Hukumar Samar da Ruwa a Ƙananan Garuruwa (STOWA) za ta gudanar da ayyukan da aka ware wa naira miliyan 208.5.

Ayyukan sun haɗa da haƙa rijiyoyin burtsatse masu amfani da injinan tuka- tuka, gina rijiyoyin samar da ruwa masu amfani da hasken rana, girka famfunan ruwa na ƙarƙashin ƙasa da na’urorin hasken rana, tare da gyara da inganta tsofaffin cibiyoyin samar da ruwa.

Kwamishinan ya bayyana cewa, an tsara ayyukan ne domin inganta samun tsaftataccen ruwan sha, musamman a ƙauyuka da sauran wuraren da ba su da isassun hanyoyin samar da ruwa.

Ya ƙara da cewa ayyukan za su taimaka wajen inganta lafiyar al’umma da tsaftar muhalli, rage dogaro da wutar lantarki da man fetur wajen samar da ruwa, tare da ƙarfafa amfani da makamashin hasken rana.

Sagir Musa Ahmed ya ce ana sa ran hukumomin da aka ɗora wa alhakin gudanar da ayyukan za su tabbatar da inganci, kulawa ta musamman, gaskiya da riƙon amana wajen aiwatar da su.

Fassara: Safiyah Abdulkadir