INEC Za Ta yi Zaben Cike Gurbi na Dawakin Kudu/Warawa Ranar 20 ga Watan Yuni

Daga Khadijah Aliyu

Hukumar Zabe Mai Zaman Kanta ta Kasa INEC, ta bayyana ranar 20 ga watan  Yunin 2026 domin gudanar da zaɓen cike gurbi na kujerar Warawa/Dawakin Kudu a Jihar Kano bayan rasuwar ɗan majalisar wakilai.

Kwamishinan Zabe na Jihar (REC), Zango Abdu, ya ce an riga an fara shirin zaɓen, inda aka kai ziyara domin duba matakin shiri a ƙananan hukumomin Warawa da Dawakin Kudu.

Ya bayyana cewa Warawa na da rumfunan zaɓe 303 da masu rajista 162,445, yayin da Dawakin Kudu ke da  rumfunan zaɓe 143 da masu rajista 75,623

INEC ta ce fiye da ma’aikata 2,000 ne za a tura domin gudanar da aikin, tare da haɗin gwiwar matasa masu yi wa kasa hidima NYSC,  da jami’an tsaro don tabbatar da zaɓe lami lafiya.

Haka kuma hukumar ta bayyana cewa Kano na kan gaba a rajistar sabbin masu kaɗa ƙuri’a, inda fiye da mutum 210,000 suka yi rajista, kuma sama da 190,000 sun kammala cikakken rajista.

REC ya roƙi ‘yan siyasa da su guji tashin hankali, yana mai cewa ana bukatar zaman lafiya domin sahihin zaɓe mai inganci.