‘Yan Sanda Sun Kama Mutane 345 Tare da Kwato Makamai 270 a Kano

Daga Abdullahi Jalaluddeen

Rundunar ‘Yan Sanda a Jihar Kano ta ce ta kama mutane 345 tare da kwato makamai masu haɗari guda 270 a wani samame na kwanaki uku da aka gudanar a faɗin jihar domin yaƙi da daba, fataucin miyagun ƙwayoyi da sauran laifuka.

Kwamishinan ‘Yan Sandan Jihar Kano, Ibrahim Adamu Bakori, ya bayyana hakan yayin taron manema labarai a hedikwatar rundunar da ke Bompai. Ya ce an gudanar da aikin tsakanin 5 zuwa 7 ga watan Yuni a dukkan ƙananan hukumomi 44 na jihar.

Ya ce samamen ya mayar da hankali ne kan maboyar masu laifi, wuraren da ake yawan aikata laifuka da cibiyoyin rarraba miyagun ƙwayoyi, bisa umarnin Sufeto Janar na ‘Yan Sanda na ƙara kaimi wajen yaƙi da laifuka.

Bakori ya ce daga cikin waɗanda aka kama akwai masu daba, masu fataucin miyagun ƙwayoyi da kuma mutanen da aka samu da makamai masu haɗari, inda ake ci gaba da bincike a kansu kafin gurfanar da su a kotu.

Ya ƙara da cewa jami’an rundunar sun kwato wuƙaƙe, adduna, sanduna da sauran kayayyakin da ake zargin ana amfani da su wajen aikata tashin hankali.

Haka kuma, rundunar ta kama ɗimbin miyagun ƙwayoyi da suka haɗa da tabar wiwi, ƙwayoyin Exol da kuma wani  sinadari mai haɗari da aka fi sani da “Suck and Die”.

Kwamishinan ya danganta nasarar da aka samu da Operation Kukan Kura da kuma sabon kula da Manyan Laifuka na Tashin Hankali (VCRU), waɗanda suka taimaka wajen inganta sintiri, tattara bayanan sirri da gaggauta kai dauki.

Ya jaddada cewa rundunar za ta ci gaba da yaƙi da laifuka a Kano, tare da yabawa gwamnatin jihar da al’umma bisa haɗin kan da suke bai wa jami’an tsaro wajen tabbatar da zaman lafiya.