Labarai

Majalisar Kano Za Ta Karɓi Kasafin Kuɗin Shekarar 2027

Published

3 days ago

November 9, 2026

Daga Khadijah Aliyu

Majalisar Dokokin Jihar Kano na shirin karɓar daftarin kasafin kuɗin shekarar 2027 daga Gwamna Abba Kabir Yusuf a ranar Laraba, 11 ga Nuwamban 2026, domin nazari da tantancewa kafin amincewa da shi.

Shugaban Majalisar, Jibril Ismail-Falgore ne ya bayyana hakan yayin zaman majalisar, bayan karanta wasiƙar da gwamnan ya aike wa majalisar, inda ya sanar da aniyarsa ta gabatar da daftarin kasafin kuɗin.

A cikin wasiƙar, Gwamna Yusuf ya ce gabatar da kasafin kuɗin ya zama wajibi a kansa bisa tanadin sashe na 121(1) na Kundin Tsarin Mulkin Najeriya na shekarar 1999, wanda aka yi wa kwaskwarima.

Ya bayyana cewa daftarin kasafin kuɗin ya ƙunshi hasashen kuɗaɗen shiga da kashe kuɗaɗen jihar a shekarar kuɗi ta 2027, wanda zai miƙa wa ’yan majalisar domin nazari da amincewa da shi.

Gwamnan ya kuma buƙaci majalisar da ta shirya dukkan abubuwan da suka dace domin gudanar da zaman gabatar da kasafin kuɗin.

A wani labarin kuma, Majalisar ta amince da wani ƙuduri da ke kira ga gwamnatin jihar da ta gaggauta gyara Cibiyar Mata ta City Women’s Centre da kuma cibiyar Hukumar Ilimin Manyan Makarantu (Agency for Mass Education), da ke kan titin Fadar Sarki, Kofar Nassarawa, a Ƙaramar Hukumar Kano Municipal.

Ɗan majalisar mai wakiltar mazaɓar Kano Municipal, Nabil Aliyu Daneji, ne ya gabatar da ƙudurin, inda ya ce cibiyoyin sun lalace sakamakon rashin kulawa na tsawon lokaci, lamarin da ya shafi ayyukan da suke gudanarwa ga mata da manyan ɗalibai.

Ya bayyana cewa ci gaba da lalacewar cibiyoyin na kawo cikas ga ƙoƙarin bunƙasa ilimi, koyon sana’o’i da kuma ƙarfafa tattalin arzikin al’umma.

Ɗan majalisar ya jaddada cewa gyara da inganta cibiyoyin zai dawo da su cikin yanayin gudanar da ayyukansu yadda ya kamata.

Bayan muhawara, Majalisar ta amince da ƙudurin tare da kira ga gwamnatin jihar da ta ba da fifiko wajen yin cikakken gyara da inganta cibiyoyin.

Majalisar ta bayyana cewa dawo da cibiyoyin cikin yanayin aiki zai inganta damar samun ilimi, koyon sana’o’i da shirye-shiryen ƙarfafa tattalin arziki, musamman ga mata da manyan ɗalibai.

Fassara: Safiyah Abdulkadir