SUBEB da UNICEF Sun Horas da Malaman Firamare a Jigawa

Hukumar Ilimin Bai Daya ta Jihar Jigawa (SUBEB), tare da haɗin gwiwar Asusun Kula da Kananan Yara na Majalisar Dinkin Duniya (UNICEF), ta horas da malamai kan yadda za su gudanar da gwajin karatu da lissafi ga ɗaliban makarantun firamare.

Mai bada  shawara kan tantance ilimin yara a matakin farko na UNICEF Dakta Farouk Aliyu, ya bayyana cewa horon na kwanaki huɗu wanda ya fara a ranar Litinin, na da nufin tantance matsayin yadda dalibai ke koyon karatu a makarantu.

A cewarsa, sun mayar da hankali ne kan ɗaliban aji ɗaya da aji biyu na firamare da kuma malamansu a fannin lissafi da harshen Hausa a kowace makaranta.

Dakta Farouk Aliyu ya ce manufar wannan shiri ita ce samar da hanya mafi sauki da dalibai za su samu ƙwarewar karatu da lissafi a matakin farko a Jihar Jigawa.

Ya ƙara da cewa, ana kuma son fahimtar yadda malamai ke koyarwa tare da tantance ko suna bin hanyoyin koyarwa da UNICEF da sauran hukumomin ilimi suka koyar.

Ya ce idan aka samu gibi, hakan zai sa a sake horas da malamai da tsara manufofi, ko ma sauya tsarin manhajar karatu gaba ɗaya.

Mashawarcin na UNICEF ya ce an horas da mahalarta 67 waɗanda za su tattara sahihan bayanai masu inganci da za su taimaka wajen tsara manufofin da za su tallafa wa tsarin ilimi a jihar.

UNICEF ta dade tana tallafa wa tsarin ilimi a Jigawa da Najeriya baki ɗaya ta hanyar horas da malamai da samar da kayayyakin koyo da koyarwa.

Wannan horon ya ƙara jaddada ƙudirin Kungiyar Tarayyar Turai da gwamnatin Jihar Jigawa wajen inganta sakamakon koyo tare da tabbatar da cewa kowane yaro ya samu ƙwarewar karatu da lissafi tun daga tushe.

Rediyon Najeriya ya ruwaito cewa, an horas da sama da malamai 1,680 na azuzuwan firamare daya zuwa uku, kan hanyoyin koyar da karatu da lissafi  domin inganta koyarwa da samun sakamako mai kyau.

Haka kuma, an raba sama da kayayyakin koyo da koyarwa 152,386 ga ɗaliban matakin farko a makarantun da shirin ya shafa.