Jami’an ‘Yan Sanda 272 Sun Sami Karin Girma A Kano

Kwamishinan ‘Yan sandan Jihar Kano, Salman Dogo Garbaya ja hankalin jami’an rundunar  jihar su 272 da suka sami karin girma da su kasance masu kishin kasa, da kwazo da jajircewa wajen gudanar da ayyukansu.

CP Salman Dogo Garba ne ya bayyana haka ne  a lokacin da yake bai wa  jami’an shaidar karin a hedikwatar ‘yan sanda da ke Bompai, a Kano.

Ya bukace su da su sauke nauyin  da aka dora musu, ta hanyar kula da hakkin al’umma da kuma kare dukiyoyinsu.

“Sabbin mukamanku suna tattare  ne da sabbin ayyuka da ke bukatar kishin kasa, da sadaukarwa wajen yi wa al’umma hidima.” Inji Garba.

“Ina so in tunatar da ku cewa, wannan wani kalubale ne a gare ku. Yayin da kuke samun karin girma, ayyukanku ne  suke karuwa. Ina yi muku fatan samun nasara a yayin ayyukanku.”

Kwamishinan ya ce al’ummar Kano da ma ‘yan Najeriya na sa ran abubuwa da dama daga gare su, inda ya bukaci jami’an da aka kara musu girma da su jajirce wajen gudanar da ayyukansu bisa tsoron Allah.

Ya ce jami’an da aka kara wa girma sun hada da manyan Sufetan ‘yan sanda 4 da suka sami mataimakin kwamishinan ‘yan sanda AC, sai  Sufetan ‘yan sanda 50 da suka sami mukamin babban Sufetan ‘yan sanda, da mataimakan Sufurtandan ‘yan sanda 32 da suka  zama Supretendad, da kuma jami’ai 182 da suka zama  mataimakan Sufurtandan ‘yan sanda.

Iyalan  jami’an da suka sami karin girman na daga cikin manyan bakin da suka halarci taron.

Abdullahi Jalaluddeen