Labarai
Shugaba Tinubu Ya Gabatar da Kasafin 2026 a Gaban Majalisa
Daga Bello Wakili
Shugaba Bola Ahmed Tinubu ya gabatar da kasafin kuɗin shekarar 2026 da ya kai Naira Tiriliyan 58.18 ga zaman haɗin gwiwa na Majalisar Dokoki ta Ƙasa, inda ya bayyana shi a matsayin “Kasafin Ƙarfafa Ci gaba, Sabunta Juriya da Wadata ga Kowa.”
Da yake jawabi ga ’yan majalisa a Abuja, Shugaban ya ce Dokar Kasafin Kuɗi ta 2026 ta ginu ne bisa sauye-sauyen tattalin arziki da aka aiwatar cikin shekaru biyu da rabi da suka gabata, waɗanda suka mayar da hankali kan daidaita tattalin arziƙin ƙasa, karfafa masu zuba jari, da shimfiɗa tubalin ci gaba mai amfani ga kowa.
Shugaba Tinubu ya tsara kashe naira tiriliyan 15.25 domin gudanar ayyukan yau da kullum na gwamnati, sannan ya ware naira tiriliyan 26.08 domin gudanar da manyan ayyuka da more rayuwa a ƙasar.
Tinubu ya tsara kasafin ne a bisa hasashen farashin gangar ɗanyen man fetur a kan dala 64.85.
Haka an yi hasashen sama da gangar ɗanyen man fetur miliyan 1.84 a kullum, sannan ya ayyana canjin dala a kan naira 1,400.
Ma’aikatun da suka fi samun kasafi su ne Ma’aikatar Tsaro, inda za ta sami Naira tiriliyan 5.41, sai ababen more rayu, inda za a kashe Naira tiriliyan 3.56, yayin da Ma’aikatar Ilimi za ta kaishe Naira Tiriliyan 3.52, sai Ma’aikatar Lafiya kuma za ta kashe Naira tiriliyan 2.48.
Tinubu ya ce tsaro shi ne ginshiƙin ci gaba, inda ya sanar da sake fasalin tsarin tsaron ƙasa da kuma sabon tsarin yaƙi da ta’addanci.
A fannin ilimi kuwa, Shugaban ya bayyana faɗaɗa Shirin Lamunin Ilimi na Ƙasa (NELFUND), wanda ya tallafa wa sama da dalibai 788,000 a manyan makarantu 229.
Yayin gabatar da Dokar Kasafin Kuɗi, Tinubu ya nemi haɗin kai tsakanin ɓangaren zartarwa da majalisa, yana mai cewa “Da haɗin kai da jajircewar al’ummar Najeriya, za mu cika dukkan alkawarin Ajandar Sabunta kudurori (Renewed Hope Agenda),” in ji shi.
-
Labarai4 days agoGwamnan Kano Ya Mika Sunayen Sabbin Kwamishinoni 2 Ga Majalisa Domin Tantancewa
-
Labarai5 days agoGwamnatin Neja Ta Jaddada Ƙudurinta Na Farfaɗo Da Kamfanin Buga Takardun Gwamnati
-
Labarai5 days agoAn Ceto Wani Mutum da Ya Fada Kududdufi a Kano
-
Labarai5 days agoTsangayar Kimiyyar Kula Da Lafiya Ta BUK Ta Lashe Zinare A Gasar Kwallon Ƙafa Ta Tsangayu Karo Na 19
-
Labarai3 days agoJigawa: Hukumar Jin Dadin Alhazai Ta Kafa Kwamitin Tantance Bayanan Maniyyatan 2027
-
Labarai5 days agoDan Takarar Gwamnan Sokoto Na ADC Ya Tsalleke Rijiya da Baya Daga Yunkurin Hallaka Shi
-
Labarai5 days agoShugaban Majalisar Wakilai Ya Jaddada Muhimmancin Samar Da Ilimi, Lafiya Da Tsaro Ga Al’umma
-
Labarai5 days agoDurumbun Gusau Ya Bukaci Haɗin Gwiwa Wajen Magance Matsalar Tsaro
