Gwamna AbdulRazaq Ya Yi Jimamin Kisan Jami’in Gandun Daji

Gwamnan Jihar Kwara, AbdulRahman AbdulRazaq, ya bayyana matuƙar baƙin cikinsa kan rasuwar wani jami’in gandun daji, Omotosho Olawuyi Samuel, wanda ya rasa ransa yayin artabu da wasu ’yan bindiga masu garkuwa da mutane a ƙauyen Koro, da ke Ƙaramar Hukumar Ekiti ta jihar.

A cikin wata sanarwa da mai magana da yawun gwamnan, Rafiu Ajakaye, ya fitar, gwamnan ya yaba da jarumtaka da kishin ƙasa da jami’an gandun daji da ’yan sa-kai na tsaro na al’umma suka nuna, inda suka kai farmaki kan ’yan bindigar da ke tserewa.

Sanarwar ta kuma bayyana cewa gwamnatin jihar za ta bayar da tallafin naira miliyan goma (₦10m) ga iyalan mamacin jami’in, a matsayin alamar godiya da jin daɗin gwamnati bisa sadaukarwar rayuwarsa.

Haka zalika, sanarwar ta miƙa ta’aziyya ga iyalan Omotosho Olawuyi Samuel da kuma abokan aikinsa da suka yi yaƙi tare da shi cikin jarumta.

ALI MUHAMMAD RABIU