Babban Lauyan Jihar Kwara Ya Tabbatar da Gudanar da Adalci da Kare Hakkokin Mace

Babban Lauya kuma Kwamishinan Shari’a na Jihar Kwara, Barista Senior Ibrahim Sulyman, ya tabbatar da cewa ma’aikatarsa za ta ci gaba da inganta adalci, kyakkyawan shugabanci, da samar da damar samun shari’a ga kowane ɗan ƙasa.

Sulyman ya bayyana hakan ne a lokacin taron manema labarai na watanni uku (quarterly ministerial briefing) da aka gudanar a birnin Ilorin.

A cewarsa, Ma’aikatar Shari’a ta Jihar Kwara tana daga cikin ma’aikatun da ke ba da muhimmanci ga hidima ga jama’a, wadda ke da alhakin gurfanar da masu laifi a kotu, kare gwamnati, tsara da tantance takardun doka, da kuma ba da shawarar doka ga sauran ma’aikatun gwamnati.

Ya bayyana cewa ma’aikatar na aiki ta hannun sassa guda shida (directorates) da kuma cibiyoyi biyu (centres), waɗanda ke taimakawa wajen tabbatar da adalci da ingantaccen gudanar da ayyukan gwamnati a jihar.

Daga cikin nasarorin da ma’aikatar ta samu a wannan zangon, Sulyman ya ce sun haɗa da tsarawa, shirya, da tantance sama da yarjejeniyoyi da kudurori 100, tare da ƙara yawan kudaden shiga ga gwamnati.

Babban Lauyan ya yabawa ma’aikatan dukkan sassan ma’aikatar bisa jajircewarsu da gudunmawar da suka bayar wajen cimma waɗannan nasarori a cikin lokacin da aka tantance.

Ali Muhammad Rabiu