Builder Uba Ya Taya Sabon Shugaban ALGON Na Jihar Jigawa Murna

Shugaban Karamar Hukumar Birnin Kudu, Dr. Builder Muhammad Uba, ya taya Shugaban Karamar Hukumar Dutse, Dr. Sibu Abdullahi murna, bisa samun nasarar zama sabon Shugaban Ƙungiyar Ƙananan Hukumomin Najeriya (ALGON) a Jihar Jigawa.

A wata sanarwa da ya fitar a ranar Talata, Dr. Uba ya bayyana zaben Dr. Sibu a matsayin gagarumar nasara tare da yi masa fatan alkhairi yayin aikinsa.

Ya bayyana kwarin gwiwar cewa jagorancin Dr. Sibu zai ƙarfafa haɗin kai da fahimtar juna tsakanin ƙananan hukumomi 27 na jihar, wanda hakan zai haɓaka samar da ci gaba,  tare da inganta tattalin arziki a fadin Jigawa.

Dr. Uba ya kuma yi addu’ar fatan alkhairi ga Jihar Jigawa da shugabanninta domin cimma nasarar manufofin da aka sanya a gaba.

Shugaban Karamar Hukumar Birnin Kudu ya yi wa Dr. Sibu fatan samun nasarar shugabanci tare da bayyana tabbacin cewa jagorancinsa zai yi tasiri mai kyau ga al’ummar Jihar Jigawa.

Usman Muhammad Zaria