Kungiyar Gwamnonin Nijeriya Ta Yi Alhini Ga Waɗanda Suka Rasu A Hare-Haren Ta’addanci

Kungiyar Gwamnonin Nijeriya ta bayyana damuwarta kan harin ta’addanci da aka kai daren Asabar a wasu al’umma uku na Tunga-Makeri, Konkoso da Pissa a Jihar Niger, wanda ya yi sanadiyyar mutuwar mutane da dama tare da sace wasu fararen hula marasa laifi.

A cikin wata sanarwa da Shugabanta kuma Gwamnan Jihar Kwara, AbdulRahman AbdulRazaq, ya sanya wa hannu, kungiyar ta miƙa ta’aziyya ga al’ummar da gwamnatin Jihar Niger bisa wannan mummunan lamari.

Haka kuma, NGF ta jajanta wa al’ummar da gwamnatin Jihar Kwara kan sabon harin ta’addanci da aka kai a Woro da ke Ƙaramar Hukumar Kaiama, inda aka kashe mutane da dama marasa laifi saboda sun ƙi amincewa da wata bakuwar akida da ba ta dace da koyarwar Musulunci ba.

Sanarwar ta kuma jajanta wa dukkan iyalan da suka rasa ’yan uwansu a waɗannan hare-haren ta’addanci marasa imani, tare da bayyana fahimta da goyon baya ga azabar da raɗaɗin da waɗanda suka tsira ke fuskanta. Haka nan ta yi addu’ar dawowar lafiya ga dukkan mutanen da har yanzu ba a san inda suke ba.

Kungiyar ta yaba wa jami’an tsaro bisa jarumtaka, nasarori da kuma gagarumar sadaukarwar da suke yi a sassa daban-daban na ƙasar nan.

Sanarwar ta bukaci jami’an tsaro da su yi amfani da cikakken ikon gwamnati wajen murƙushe ’yan ta’adda da masu haɗa baki da su, tare da kawo ƙarshen wannan mummunan yanayi nan take.

A ƙarshe, NGF ta bayyana cikakken tabbaci ga ƙarfin jami’an tsaro na samun nasara a yaƙin da ake yi da ta’addanci, fashi da makami da kuma garkuwa da mutane.

REL/ALI MUHAMMAD RABIU