Sojoji Sun Yi Nasarar Kwato Dabbobi 257 da Aka Sace a Karamar Hukumar Gwarzo

Daga Abdullahi Jalaluddeen

Sojojin Najeriya sun sami nasarar dawo da Shanu da Awaki  257 da aka sata a  wani aikin tsaro na haɗin gwiwa a Ƙaramar Hukumar Gwarzon Jihar Kano.

An gudanar da aikin ne ta haɗin gwiwar rundunar tsaro karkashin Bataliya ta 3, bayan samun kiran gaggawa daga mazauna yankin.

Mataimakin Daraktan Harkokin Yada Labarai na Soji, Majar Babatunde Zubair, ne ya bayyana haka a cikin wata sanarwa da aka rabawa manema labarai a Kano.

Ya ce rundunar tsaron ta samu kiran gaggawa ne da misalin ƙarfe 6 na safe ranar 1 ga watan Maris, inda suka garzaya inda lamarin ya faru nan take.

A cewarsa, sojojin sun yi musayar wuta da ‘yan bindigar inda suka samu nasarar dawo da dabbobin da aka sata, waɗanda suka haɗa da Shanu, Awakai da Jaki guda daya.

Manjo Zubair ya ƙara da cewa an mika dabbobin da aka dawo da su ga masu su, yayin da ake ci gaba da ƙoƙarin bin sawu don kamo ‘yan bindigarda suka tsere.