Ana Cigaba Da Ceto Mutanen Da Suka Makale Wajen Hakar Ma’adanai A Naija

Masu aikin ceto sun ceto mutane bakwai da suka makale a wani wajen hakar ma’adanai a yankin Galadima Kogo da ke karamar hukumar Shiroro ta Jihar Neja.

Ministan ma’adanai, Dele Alake  ya bayyana hakan a wata sanarwa da mai taimaka masa na musamman kan harkokin yada labarai, Segun Tomori ya fitar ranar Talata a Abuja.

Ya ce an tura masu bayar da agaji zuwa wajen da lamarin ya faru, inda ya kara da cewa ana aikin ceton tare da hadin gwiwar kamfanin hakar ma’adanai.

Kamfanin dillancin labaran Nijeriya (NAN), ya ruwaito cewa kimanin  mutane 30 ne suke makale cikin ramin da ake hakar ma’adanai da wani ke aiki.

Kamfanin dillancin labaran na NAN ya kara da cewa Darakta-Janar na Hukumar Bayar da Agajin Gaggawa na Jihar Neja (NSEMA)Alhaji Abdullahi Arah ya ce lamarin ya faru ne sakamakon mamakon ruwan sama.

Ministan ya ce kokarin da gwamnatin tarayya ke yi ya nuna yadda ta himmatu wajen ganin an dakile asarar rayuka, da kuma ceto wadanda suka makale.

“Da samun labarin faruwar lamarin, sai muka tura jami’an kula da ma’adanai na tarayya (FMO) da jami’an hukumar binciken ma’adanai wajen domin ceto wadanda suka makale“.

“Tare da hadin gwiwar kamfanin hakar ma’adanai, mun ceto mutane bakwai da suka makale, ana kuma ci gaba da gudanar da aikin ceto a wajen,” in ji shi.

Ya bada  tabbacin cewa gwamnatin tarayya ta kuduri aniyar yin bincike kan musabbabin afkuwar lamarin.