An Bai Wa Alhazan Jihar Naija Tabbacin Samun Kyakkyawar Kulawa Yayin Aikin Hajji

Alhazan jihar Neja sun samu tabbacin kyautata walwala da jin dadinsu yayin da suke kasa mai tsarki  don gudanar da aikin hajjin bana.

Mataimakin gwamnan jihar, Kwamared Yakubu Garba ya ba da wannan tabbacin ga jirgin karshe na jigilar alhazan jihar  daga filin jirgin sama na Bola Ahmad Tinubu da ke Minna zuwa birnin Madina na kasar Saudiyya.

Kwamared Yakubu Garba ya ce  gwamnatin jihar Naija a karkashin jagorancin Gwamna Mohammed Umar Bago Alhazan jihar ta yi tanadi na musamman ga Alhazan domin samun  kyakkyawar kulawar da ta da ce yayin gudanar da aikin hajjin bana ba tare da wata matsala ba.

Ya kuma yi kira ga Mahajjatan da su yi addu’a ga jihar Neja da kasa baki daya, domin fatan Allah Ya warware dukkan kalubalen da ake fuskanta.

A nasa jawabin Amirul Hajj na jihar kuma Sarkin Kagara, Ahmed Garba Gunna Attahiru na biyu, ya bayyana jin dadinsa bisa goyon baya da hadin kan da  Gwamna Umar Bago ya ba su domin gudanar da aikinsu.

Ya ce a nasu bangaren mambobin tawagarsa za su yi duk mai yiwuwa don tabbatar da ganin sun sauke nauyin da aka daura musu.

Aliyu Lawal