Sanata Yari Ya Raba Shanu 380 Ga Al’umma Domin Bikin Sallah

Sanata mai wakiltar mazabar Zamfara ta yamma, Alhaji Abdulaziz Yari Abubakar ya fara rabon shanu 380 ga mazabun siyasa 147 a kananan hukumomi 14 na jihar.

Da yake kaddamar da shirin rabon shanun da aka gudanar a Unguwar Kasuwar Daji da ke karamar Hukumar Kauran Namoda, shugaban kwamitin rabon Alhaji Lawal Liman Gabɗon Mattaura ya bayyana cewa, hakan na daga cikin karramawar Sanata Yari ga shuwagabanni da masu ruwa da tsaki na jam’iyyar APC a jihar.

Lawal Liman wanda kuma shi ne shugaban kungiyar siyasar Sanatan ya ce kowace Unguwa za ta karbi shanu biyu domin gudanar da bukukuwan Sallah cikin farin ciki.

            Shugabannin kwamitin rabo

Shugaban wanda ya samu wakilcin dan kwamitin, Muhammad Muttaka Rini (Makaman Zamfara), ya bayyana cewa, Gundumomin da ke karkashin kananan hukumomi 4 da suka hada da Kaura Namoda, Zurmi, Shinkafi da Birnin Magaji da suka hada mazabar Sanatan Zamfara ta Arewa sun karbi kason su.

A cewarsa, sauran unguwannin kananan hukumomi 10 da ke karkashin mazabar Zamfara ta tsakiya da Zamfara ta yamma za su karbi nasu rabon ne tsakanin ranakun Litinin zuwa Talatar wannan makon.

A yayin da yake yabawa da irin namijin kokarin da Sanata Abdulaziz Yari Abubakar ya yi na yi wa al’ummarsa hidim, shugaban ya yi kira ga sauran shugabannin siyasar jihar da su yi koyi da irin wannan karamcin da nufin tabbatar da zaman lafiyar  al’umma da inganta  tattalin arzikin  don rage musu radadi.

Shugaban ya kuma yi kira ga al’ummar Musulmi musamman na jihar da wadanda suka je aikin Hajji da su yi amfani da wannan kwanaki goma na Zulhijja wajen karfafa addu’o’in samun zaman lafiya da kwanciyar hankali a jihar da kasa baki daya.

Sani Dutsinma