Hukumar Alhazai Ta Jihar Kwara Ta Jajantawa Iyalan Alhazan Da Suka Rasu

Hukumar Alhazai ta jihar Kwara ta jajantawa iyalan wasu alhazai biyu da suka rasu a birnin Madina na kasar Saudiyya.

A cikin wata sanarwa da sakataren zartarwa na hukumar jin dadin alhazai ta jihar Alhaji Abdulkadir Abdulsalam  Ya fitar, ya ce Saliu Mohammed, wanda ya zo a sahu na  3 na alhazan har, ya rasu ne a sashin kula da marasa lafiya na wani asibitin gwamnati da ke Madina.

Ya ce Hajiya Hawawu Mohammed da ke cikin rukuni na 9 kuwa,  ta rasu ne biyo bayan fadowa daga saman benen masaukinsu  da ke Madina.

Alhaji Abdulsalam ya ce hukumar alhazai na cike da alhinin wannan lamarin,  ta kuma mika ta’aziyya ga iyalansu tare da yi musu addu’ar Allah ya jikan su da Aljannar Firdausi.

Ali Muhammad Rabi’u