Jami’ar Bayero Ta Kori Dalibai 171 Bisa Gabatar da Takardun Bogi

Daga Khadijah Aliyu

Jami’ar Bayero da ke Kano (BUK) ta amince da korar dalibai 171 bisa laifin gabatar da takardun shigar jami’a na bogi.

An yanke wannan hukunci ne a yayin taron majalisar jami’ar karo na 433, bayan rahoton kwamitin majalisar kan matsalolin rashin sahihancin takardun shiga jami’ar.

A cewar wata sanarwa da jami’ar ta fitar a cikin mujallarta ta mako-mako, an gano cewa daliban da abin ya shafa sun gabatar da takardun bogi yayin neman gurbin karatu, wanda ya saba wa dokokin jami’ar.

Jami’ar ta bayyana cewa wannan laifi ya saba wa Sashe na 20.7, rukuni na A (vii) na dokokin jarabawa da harkokin ilimi, wanda ke tanadin hukuncin kora ga irin wannan laifi.

BUK ta kara da cewa daliban da abin ya shafa sun fito ne daga sassa da matakai daban-daban, tare da jaddada cewa matakin na daga cikin kokarin tsaftace harkar karatu da kuma kare martabar jami’ar.

A wani bangare kuma, majalisar ta amince da korar Yusuf Muhammad Sani, dalibi a sashen Injiniyan Gine-gine, bisa zargin hannu a dukan masu sanya ido a jarabawa.

Jami’ar ta ce lamarin ya kawo tsaiko a gudanar da jarabawar tare da karya dokokin ladabtar da dalibai.

Hukumar jami’ar ta sake jaddada kudurinta na tabbatar da gaskiya da nagarta a harkokin ilimi, tare da gargadin cewa duk wanda ya karya dokokinta zai fuskanci tsattsauran hukunci.