Kebbi: An Samu Asarar Rayuka a Rikicin Alwasa

Daga Sani Dutsinma

Rundunar ‘Yan Sanda a Jihar Kebbi ta ce an dawo da zaman lafiya a ƙauyen Alwasa da ke Ƙaramar Hukumar Argungu.

Jami’in Hulɗa da Jama’a na rundunar, SP Bashir Usman, ne ya bayyana hakan a cikin wata sanarwa da ya fitar ga manema labarai a Birnin Kebbi, babban birnin jihar.

Ya ce ƙauyen Alwasa na cikin kulawar tsaro, biyo bayan gaggauta tura jami’an ‘yan sanda tare da ƙarin dakaru, waɗanda ke kan aiki domin sa ido kan yanayin tsaro, tabbatar da doka da oda, da kuma hana sake ɓarkewar rikici.

A cewar sanarwar, lamarin ya faru ne a lokacin bikin Sallah, inda rikici ya ɓarke tsakanin wasu matasa, wanda ya yi sanadiyyar asarar rayuka, yayin da wasu suka  jikkata, wadanda a halin yanzu suke samun kulawa a Asibitin Gwamnati na Argungu.

Bayan wannan, an samu harin ramuwar gayya wanda ya haifar da ƙarin asarar rayuka. Rundunar ‘yan sandan ta ce ta fara gudanar da cikakken bincike kan lamarin, tare da ƙoƙarin gano da kama duk waɗanda ke da hannu a ciki.

Kwamishinan ‘Yan Sandan jihar, CP Umar Mohammed Hadejia, ya yi Allah-wadai da lamarin, tare da gargadin cewa duk wanda aka samu da hannu cikin aikata laifi ko tayar da tarzoma zai fuskanci fushin hukunma.

Ya kuma buƙaci mazauna yankin da su kwantar da hankalinsu, su guji yaɗa jita-jita, su kuma kauce wa ɗaukar doka a hannunsu, yana mai cewa za a ci gaba da sanar da jama’a.