Harin Shanga: Gwamnatin Tarayya Za Ta Tallafawa Iyalan Jama’an Tsaro da Aka Kashe

Daga Bello Wakili 

Gwamnatin Tarayya ta tabbatar wa iyalan jami’an tsaro da aka kashe a wani harin baya-bayan nan da ya faru a ƙaramar hukumar Shanga ta Jihar Kebbi cewa za ta ci gaba da kula da walwalarsu.

Mataimakin Shugaban Ƙasa, Kashim Shettima, ne ya bayar da wannan tabbaci a Birnin Kebbi yayin ziyarar ta’aziyya da ya kai wa Gwamna Nasir Idris, biyo bayan kisan jami’an tsaro goma sha ɗaya da kuma rasuwar Shugaban Majalisar Dokokin Jihar Kebbi, Muhammad Usman Zuru, a birnin Alkahira na ƙasar Masar.

Mataimakin Shugaban Ƙasa, wanda ya jagoranci tawagar Gwamnatin Tarayya a madadin Shugaba Bola Tinubu, ya ce sadaukarwar jami’an da suka rasu ba za ta tafi a banza ba, yana mai jaddada cewa walwalar jami’an tsaro da iyalansu na daga cikin manyan abubuwan da gwamnati ta sa a gaba.

Ya bayyana cewa Shugaban Ƙasa ya umurci Hukumar Ba da Agajin Gaggawa ta Ƙasa (NEMA) da ta samar da tallafin agaji ga iyalan da abin ya shafa da kuma al’ummomin da suka rasa matsugunansu.

Kashim Shettima ya yi addu’ar Allah ya gafarta wa waɗanda suka rasu, tare da yin faran alkhairi ga al’ummar jihar.