Rukunin Farko na Alhazan Jihar Kebbi ya Isa Kasa Mai Tsarki

Daga Sani Dutsinma 

Gwamnan Jihar Kebbi, Dakta Nasir Idris, ya yi bankwana da rukuni na farko na maniyyata 418 daga jihar da suka tashi  zuwa ƙasar Saudiyya domin fara aikin Hajjin shekarar 2026.

Yayin da yake jawabi ga maniyyatan kafin tashinsu a Filin Jirgin Sama na Ahmadu Bello da ke Birnin Kebbi, Gwamna Idris ya nuna godiya ga Allah Maɗaukakin Sarki da Ya ba su damar halartar aikin Hajjin bana.

Gwamna Nasir Idris ya buƙaci su kasance jakadu nagari na jihar da ma Najeriya gaba ɗaya a duk tsawon zamansu a ƙasa mai tsarki, tare da yin kira a garesu da su yi addu’ar zaman lafiya a Jihar Kebbi da ƙasa baki ɗaya.

Jirgi na farko ya tashi ne da yammacin ranar Lahadi, ɗauke da maniyyata 418 daga ƙananan hukumomin Aliero, Koko/Besse, Bunza da Kalgo, tare da jami’an Hukumar Jin Daɗin Alhazai ta Jihar Kebbi.

Ya tabbatar wa maniyyatan da ingantattun tsare-tsaren jin daɗi, ciki har da samar da mafi kyawun masauki kusa da Masallacin Harami da ke Makka, abinci mai kyau da kuma biya musu Hadaya, yana mai jaddada cewa gwamnatinsa na da ƙudirin tabbatar da jin daɗi da kare mutuncin dukkan alhazai.

Gwamna Idris ya kuma bayyana cewa gwamnati ta ci gaba da al’adar tallafawa alhazai ta hanyoyi daban-daban, ciki har da ɗaukar nauyin Hadaya, da kuma samar da sufuri kyauta domin gudanar da Ziyarah a Madina.

Yayin da ya yi kira ga masu riƙe da muƙaman siyasa da sauran masu ruwa da tsaki da su taimaka wa alhazai daga yankunansu, ya kuma buƙaci maniyyatan su sadaukar da kansu ga addu’o’i domin Jihar Kebbi da Najeriya, musamman a filin Arafat.

Tun da farko, Shugaban Hukumar Jin Daɗin Alhazai ta Jihar Kebbi, Alhaji Faruk Musa Enabo, ya yaba wa Gwamnan bisa irin goyon bayan da yake bai wa alhazai. Ya bayyana muhimman matakan da aka ɗauka kamar biyan kuɗin Hadaya, inganta tsarin abinci da kuma samar da masauki mai inganci a Makka.

A jawabansu daban-daban, Malam Lawal Baiti Mai Kwalta da Malam Abubakar Atiku Walin Kalgo sun yi wa’azi kan wajibcin aikin Hajji tare da jan hankalin maniyyata da su kiyaye ladabi, gaskiya da sadaukarwa a duk tsawon aikin ibadar.