Shugaba Tinubu Ya Taya ‘Yan Wasan Najeriya Murnar Lashe Gasar Kakowa ta Afirka

Daga Bello Wakili

Shugaban ƙasa Bola Ahmed Tinubu ya taya tawagar Najeriya  murna kan bajintar da ta nuna a Gasar Kokawa ta Afirka ta shekarar 2026 da aka gudanar a Alexandria, ƙasar Masar, inda ƙasar ta lashe kambun nahiyar karo na 15 a rukunin mata.

Shugaban ya bayyana nasarar a matsayin alamar daidaito, jajircewa da kuma abin alfahari ga ƙasa, yana mai cewa ‘yan kokawar Najeriya sun sake nuna dalilin da ya sa suke kan gaba a nahiyar Afirka.

Tinubu ya ce, ‘yan wasan wadanda suka sami lambar zinare 8 da azurfa 2 daga wasanni 10 a rukunin mata, tare da jimillar lambobin yabo 9 na zinare, 4 na azurfa da 3 na tagulla a dukkan rukuni, sun nuna ƙwarewa a matakin koli da kuma jajircewa a dukkan sassan tawagar.

Ya yaba da rawar da Mercy Genesis, Adijat Idris, Esther Asaolu da Mercy Adekuoroye suka taka, inda ya ce sun nuna ƙwarewa tare da nutsuwa.

Shugaban ya kuma yabawa Harrison Onovwiomogbhwo kan nasarar da ya samu a rukunin maza na freestyle.

Ya kuma jinjina wa gudunmawar Ebierelayefa Andrew, Stephen Akintewe, Dideikemei Erefagha, Solomon Ulabo da Saviour Egoli, yana mai cewa an sami nasara ne bisa hadin kan da suka nuna.

Shugaba Tinubu ya kara da cewa wannan nasara na nuna sauyi a harkar wasanni a Najeriya, inda aka fara mai da hankali kan tsari, shirye-shirye da kuma bunƙasa ‘yan wasa na dogon lokaci.

Ya ce aikin Hukumar Wasanni ta Ƙasa ƙarƙashin jagorancin Mallam Shehu Dikko, Bukola Olopade da tawagarsu tare da ƙungiyoyi da masu horaswa na fara ɗaukar ƙarfi ta hanyar tsarin da ke ƙarfafa da’a, daidaito da kuma ƙwarewa.

Shugaban ya ƙara da cewa nasarar da aka samu a Alexandria na nuna akwai sabbin ‘yan wasa da ake shiryawa domin su yi fice a manyan wasanni a nan gaba.