Fiye da Gidaje 280 Sun Amfana da Kwandunan Zubar Sharar a Jihar Nasarawa

Fiye da gidaje dari biyu da tamanin (280) a Karamar Hukumar Lafia sun samu kwandunan ajiyar shara (trash bins) domin inganta kula da tsaftar muhalli da rage datti a babban birnin jihar.

An gudanar da rabon ne a birnin Lafia, ƙarƙashin jagorancin Kwamishinar Muhalli da Albarkatun Ƙasa ta Jihar Nasarawa, Dr. Margaret Elayo.

Shirin wayar da kai da rabon kwandunan ya shafi wasu kananan hukumomi da suka haɗa da Karu, Keffi, Akwanga, Wamba, Obi, da Keana, inda Lafia ta fi kowa samun masu cin gajiyar wannan shiri.

A yayin taron, Dr. Margaret Elayo ta bayyana damuwarta kan yadda datti ke ƙaruwa a tituna da magudanan ruwa, lamarin da ke haifar da barazana ga lafiya da muhalli.

Kwamishinar ta yi kira da a rungumi sabon tsarin zamani na sarrafa shara zuwa dukiya (waste-to-wealth), inda ta shawarci masu karɓar kwandunan da su yi amfani da su yadda ya dace wajen zubar da kwalabe da robobin ruwan sachet, tana mai bayyana cewa ana ci gaba da haɗin gwiwa da masana’antun da ke sarrafa waɗannan kayan don sake amfani da su.

Masu cin gajiyar shirin sun yaba da wannan ƙuduri na Dr. Elayo, suna jinjinawa hangen nesanta da jajircewarta wajen kare muhalli, tare da yin alkawarin amfani da tankunan cikin gaskiya da aminci domin taimakawa wajen samar da muhalli mai tsafta a Jihar Nasarawa.

Aliyu Muraki, Lafia