‘Yan Sanda Sun Bankado Maboyar Masu Garkuwa

Rundunar ‘yan sandan jihar Nasarawa ta ce ta samu wani gagarumin nasara a kokarinta na yaki da masu garkuwa da mutane da sauran manyan laifuka a jihar.

A wata sanarwa da jami’in hulda da jama’a na rundunar, SP Ramhan Nansel, ya fitar, ya ce jami’an Sashen Leken Asiri na Jihar (SID) sun samu sahihan bayanai da suka kai su ga bankado maboyar wani fitaccen mai garkuwa da mutane a Gidan Akuya da ke karamar hukumar Keana ta jihar.

Sanarwar ta ce da zarar masu laifin suka hango jami’an tsaro, sai suka yi kokarin tserewa daga wurin, amma ‘yan sanda suka bi su da sawu inda a yayin samamen aka samu nasarar kama wani da ake zargi mai suna Jibril Yunusa.

Binciken da aka gudanar a maboyar ya kai ga kwato bindiga kirar AK-47 guda daya, mujallar harsashi daya mara komai, da kuma bindiga kirar gida guda daya.

A cewar sanarwar, yayin da ake yi masa tambayoyi, wanda ake zargin ya amsa cewa ya shiga cikin hare-haren garkuwa da mutane da dama a yankunan Keana da Awe na jihar, tare da bayar da wasu muhimman bayanai da za su taimaka wajen ci gaba da bincike.

Kwamishinan ‘yan sandan jihar, CP Shetima Jauro Mohammed, ya umarci jami’an rundunar da su kara zage damtse domin kamo sauran ‘yan kungiyar da suka tsere.

Ya kuma tabbatar wa mazauna jihar kudurin rundunar na ci gaba da yaki da laifuka tare da tabbatar da tsaron rayuka da dukiyoyin al’umma a ko’ina cikin jihar.

Aliyu Muraki/Lafia