NUJ Ta Karrama Daraktar Asibitin Kula da Cututtukan Kwakwalwa na Tarayya, Kaduna, da Lambar Yabo

Ƙungiyar ‘Yan Jarida ta Nijeriya (NUJ), Reshen Jihar Kaduna, ta karrama Daraktar Asibitin Kula da Cututtukan Kwakwalwa na Tarayya da ke Kaduna, Farfesa Aishatu Yusha’u Armiya’u, da Lambar Yabo ta Kyakkyawan Aikin Hidimar Jama’a da Nagarta, sakamakon kyakkyawan jagoranci da gagarumar gudummawar da ta bayar wajen inganta lafiyar jama’a, musamman a fannin kula da lafiyar kwakwalwa.

An mika lambar yabon ne a yayin Makon -yan Jarida na Shekara ta 2025 na NUJ Reshen Jihar Kaduna, wanda aka gudanar a ranar Asabar, 13 ga Disamba, 2025, a otel Bafra Ungwan Sarki, Kaduna.

An shirya taron ne karkashin taken: “Kafofin Watsa Labarai da Tsarin Zaman Lafiya na Jihar Kaduna: Tattaunawa, Tsaro da Ci gaba a Arewa.”

Yayin gabatar da lambar yabon, NUJ Reshen Jihar Kaduna ta bayyana Farfesa Armiya’u a matsayin fitacciyar jami’ar gwamnati wadda wa’adinta a matsayin Darakta ya kasance cike da nagarta, kwarewa da kuma tsari mai mayar da hankali ga al’umma wajen bayar da ayyukan kiwon lafiya.

Kungiyar ta jaddada cewa jagorancinta ya karfafa ayyukan kiwon lafiyar jama’a ta hanyar inganta kula da lafiyar kwakwalwa, fadada wayar da kai a cikin al’umma, bunkasa ma’aikata, da kuma ci gaba da fafutukar wayar da kai kan lafiyar kwakwalwa.

A cewar NUJ, lambar yabo ta kyakkyawan aikin hidimar jama’a da nagarta tana nuna jajircewar Farfesa Armiya’u wajen jagoranci na gaskiya, rikon amana, da hidima ga bil’adama, musamman wajen daukar lafiyar kwakwalwa a matsayin muhimmin bangare na lafiyar jama’a da ci gaban al’umma.

A jawabinta na godiya, Farfesa Aishatu Yusha’u Armiya’u ta nuna matukar godiya ga NUJ bisa wannan karramawa, inda ta bayyana lambar yabon a matsayin abin karfafa gwiwa domin ci gaba da nagarta a aikin gwamnati.

Ta jaddada muhimmiyar rawar da kafofin watsa labarai ke takawa wajen wayar da kan jama’a kan al’amuran kiwon lafiya, bunkasa fahimtar lafiyar kwakwalwa, da kuma tallafa wa manufofin da ke inganta zaman lafiya, tsaro da ci gaba.

Ta sadaukar da lambar yabon ga shugabanci da daukacin ma’aikatan Asibitin Kula da Cututtukan Kwakwalwa na Tarayya, Kaduna, tare da yaba musu bisa jajircewa, hadin kai da kwarewa wajen bayar da ayyukan lafiyar kwakwalwa cikin tausayi ga al’umma.

Makon Jarida na NUJ na ci gaba da zama muhimmiyar dandali na tattaunawa kan rawar kafofin watsa labarai a harkokin mulki da ci gaba, tare da karrama mutane da hukumomin da suka yi fice wajen hidimar jama’a