Sheikh Dahira Bauchi YA Sa Albarka Ga shirin Sa Ilimin Boko Ga Manhajar Makarantun Allo

Fitaccen Malamin Addinin Musulunci a Bauchi Sheik Dahiru Usman Bauchi Ya Amince Da Hada Ilimin boko da Manhajin Almajiri.

Jagoran mabiya darikar Tijjaniya Sheikh Dahiru Usman Bauchi ya ce yana goyon bayan shirin gwamnatin tarayya na sanya ilimin boko a cikin manhajar karatun makarantun Almajiri.

Ya bayyana haka ne a lokacin da Babban Sakataren Hukumar Almajiri da Ilimin Yara marasa Makaranta ta kasa NCAOOSCE Dr Muhammad Sani Idris ya ziyarce shi a Bauchi.

Sheikh Dahiru Bauchi ya ce kungiyar Tijjaniya ta dukufa wajen ganin ta aiwatar da duk wani tsari da zai inganta zamantakewa da tattalin arzikin kasar nan.

Tun da farko Sakataren zartarwa na NCAOOSCE ya shaida wa Shehin Malamin cewa ya je gidansa ne domin neman albarkar sa yayin da ya fara ziyarce ziyarce don sake fasalin karatun Almajirai tare da kwashe miliyoyin yaran da ba sa zuwa makaranta a kan tituna.

Ya kuma jaddada cewa hadakar za ta baiwa almajirai damar samun ilimi da fasaha don yin gogayya a duniya.

Dr Muhammad Sani Idris ya kuma ce shugaban kasa Bola Tinubu ya damu da matsalar almajirai da yaran da ba su zuwa makaranta kuma ba zai bar wata kafa da za ta bi don kawo karshen ta ba.

Alhassan Bauchi/Wababe