Saqafatu Movement Foundation Ta Raba Kayan Sallah Ga Marayu.

Kungiyar Saqafatu Movement Foundation ta raba kayayyakin Sallah ga marayu na dubban naira domin samun falalar wannan wata mai albarka na Ramadan.

Shugabar kungiyar, Malama Asiya Ado Yakasai ta sanarda hakan yayin taron rabon kayayyakin da ya gudana a harabar Masallacin Saqafa dake Barnawa Kaduna.

Ta ce, shekaru 10 kenan da kungiyar ta shafe wajen hidimar baiwa marayu kayan Sallah a irin wannan lokacin na azumin watan Ramadan domin samun falalarsa.

Malama Asiya Ado Yakasai ta nemi gwamnatin da masu ruwa da tsaki su taimaka wa marayu da mabukata musamman a wannan lokaci na matsin tattalin arzikin Kasan nan.

Da take tsokaci, Uwar kungiyar Saqafatu Movement Foundation, Malama Hafsat Yahaya Misau, ta ce, kungiyar tana baiwa marayu 160 kayan Sallah kowace shekara, inda a bana ta baiwa marayu 90 kadai, sakamakon wahalar tsadar rayuwa da ake fama da shi a yanzu.

Ta yi kira ga gwamnati da mawadata su tallafawa kungiyar wajen habaka ayyukanta na alkhairi domin samun tsira a gobe kiyama.

Da yake jawabi a wajen taron, Hakimin Barnawa, Alhaji Kabiru Zubair ya yabawa aikin alkhairin da kungiyar ke gudanarwa duk shekara na taimakawa Marayu.

Ya tunatarda al’uma akan falalar taimakawa Marayu tareda addu’ar Allah Ya sanyawa kungiyar lada a mizani.

Daya daga cikin marayun da suka samu tallafin kayan Sallah Zainab Hussaini ta yi addu’ar Allah Ya cigaba da tallawa kungiyar akan irin hidimar da suke yi ma Marayu.

A wurin taron, an rabawa marayu maza da mata 90 kayan Sallah da suka kunshi atamfofi da shadda da yadi.

Khadija Kubau