Hukumar Kwastam Na Binciki Kisan Da Aka Yi A Kano

Hukumar Kwastam ta Najeriya ta kaddamar da bincike kan zargin kisan da aka yi wa Abdullahi Abdulwahab Magaji, ma’aikaci a hedikwatar Hukumar a Abuja, wanda ke zaune a unguwar Farm Center dake, Kano.

Shugaban Kwastam na Kano/Jigawa Dauda Chana ne ya bayyana hakan ga manema labarai a Kano.

Ya ce lamarin ya faru ne a gidan marigayin da ke karamar hukumar Tarauni.

Chana ya bayyana cewa an baiwa hukumar kwastam da ‘yan sanda izinin gudanar da bincike mai zurfi domin kamo wadanda suka aikata wannan aika-aika, kuma rundunar ‘yan sandan Najeriya na gudanar da bincike kan lamarin.

Hukumomi na yin kira ga mazauna yankin musamman makwaftan marigayin da su fito da sahihan bayanai domin a samu nasarar cafke wadanda ke da hannu a kisan.

ABDULLAHI JALALUDDEEN KANO/Wababe