Sheikh Daurawa Ya Amince Da Cigaba Da Jagorantar Hukumar Hisbah

Kwamandan Hisbah ta jihar kano Sheikh Aminu Ibrahim Daurawa ya dawo mukaminsa bayan sulhun da kungiyar Inuwar hadin kan malaman Kano ta jagoranta tsakanin sa da gwamnan jihar Abba Kabir Yusuf.

Idan za’a iya tunawa a ranar Juma’a ne Sheikh Daurawa ya bayyana Ajiye mukamin nasa bayan wasu kalamai da gwamnan Kano Abba Kabir Yusuf ya yi, inda ya  Kalubalanci yadda hukumar take gudanar da wasu daga cikin aiyukan ta.

Da yake zantawa da Manema labarai Mai magana da yawun gwamnan jihar kano Sanusi Bature Dawakin Tofa yace an sami mahimtar junan ne a wani zama da  da aka yi tsakanin zauren malaman kano da Sheikh Daurawa da kuma gwamna Abba Kabir Yusuf.

Yace “dama tun da farko a wajen gwamnati Malam bai ajiye aikinsa ba, saboda bai rubuta ba , don haka Ina tabbatar da cewa an sami masalaha kuma malam zai cigaba da yin aikinsa yadda ya kamata.

A wani rubutaccen jawabi da ya wallafa a shafinsa na Facebook, Sheikh  Aminu Ibrahim Daurawa ya tabbatar da yin sulhu a dare wannan rana ta Litinin.