Mutane Sama Da Miliyan 5 Ne Za Su Amfana Da Tallafin Abinci A Jigawa

Gwamnatin jihar Jigawa ta kudiri  aniyar bada tallafin kayan abinci ga  mutane sama da  miliyan biyar a karkashin shirin ciyarwa  na watan Ramadan na bana.

Da yake jawabi a wajen kaddamar da rabon kayan abinci a karkashin shirin, gwamnan jihar Malam Umar Namadi ya ce gwamnatin jihar tana sane da halin da tattalin arzikin kasar ke ciki, don haka ta fito da tsare tsare daban-daban a karkashin shirin ciyarwa na watan Ramadan.

Ya bayyana cewa, manufar shirin ciyarwa  a watan Ramadan ita ce domin a  taimaka wa al’umma su samu abin da za su ci yayin da suka yi Azumi.

Tun da farko, kwamishinan ayyuka na musamman na jihar Auwalu Danladi Sankara ya bayyana cewa, za a raba buhunan shinkafa masu dauyin kilogiram 25 guda dubu dari daya da hamsin, sai na masara shima buhu dubu dari da hamsin, da katan din taliya guda dari  ga gidaje dubu dari da hamsin.

“Gwamnan Malam Umar Namadi  ya amincewa  ma’aikatar ta samar da cibiyoyin  590 a karkashin  kwamitin shirin ciyarwa na watan Ramadan“.

A cewarsa, kowace mazaba gwamnatin jihar za ta kafa cibiyoyin bada tallafin guda biyu, tare da karin wasu cibiyoyi a masarautu biyar da wasu garuruwa.

Ya yi nuni da cewa,  kowace cibiya za ta  ciyar da mutane akalla 300 a kullum.

Ya ce, an kuma a samar da wani shiri na musamman na watan Ramadan ga ma’aikatan gwamnati, da jami’an tsaro, da  masarautu da sauran cibiyoyin gwamnati a jihar, a matsayin wani mataki na karramawa daga gwamna Umar Namadi.

Wasu daga cikin wadanda suka ci gajiyar tallafin da suka zanta da gidan rediyon Najeriya sun yabawa Gwamna Namadi bisa wannan karamcin.

Usman Muhammad Zaria