Kotu Ta Bada Belin Tsohon Gwamnan Jihar Kwara

Wata babbar kotun tarayya da ke Ilorin babban birnin jihar Kwara, ta bayar da belin tsohon gwamnan jihar, Alhaji Abdulfatah Ahmed a kan kudi naira miliyan hamsin, bisa zargin almubazzaranci da kudade a lokacin da yake mulki daga shekarar 2011 zuwa 2019.

Hukumar yaki da cin hanci da rashawa ta EFCC na tuhumar Abdulfatah bisa zargin almubazzaranci da kudaden jama’a har Naira Miliyan Dubu Daya .

Tsohon gwamnan, wanda ya kai kansa zuwa ofishin hukumar EFCC shiyyar Ilorin a ranar Litinin 19 ga watan Fabrairun 2024, an tsare shi ne bisa wasu sharuddan beli.

A hukuncin da ta yanke bayan sauraron bangarorin biyu, Mai shari’a Evelyn Anyadike ta bayar da sharuddan beli guda takwas domin sakin tsohon gwamnan.

Mai shari’a Anyadike ta ce sharuddan belin sun hada da Naira miliyan 50 , da mutum biyu da za su tsaya masa da kadarorinsu a garin Ilorin da kuma mika fasfo dinsa na tafiye-tafiye zuwa kasashen waje ga magatakardar kotun, da dai sauransu.

Da yake amsa tambayoyi daga manema labarai, lauyan hukumar EFCC Rotimi Jacobs (SAN) wanda ya bayyana cewa wanda ake kara yana kan shari’a da tuhume-tuhume 12, ya kuma ki amsa laifinsa a lokacin da aka karanta masa tuhume-tuhumen.

A nasa tsokacin, lauyan wanda ake kara, Kehinde Eleja (SAN), ya koka da yadda ake musgunawa wanda yake karewa.

An dage ci gaba da sauraron karar zuwa ranakun 29 da 30 ga watan Afrilu na wannan shekara ci gaba da domin sauraren karar

Ali Muhammad Rabi’u