Hukumar Yaki Da Rashawa Ta Kano Ta Sake Gurfanar Da Ganduje Gaban Kuliya

Hukumar yaki da cin hanci da rashawa da sauraron korafe-korafen jama’a ta jihar Kano ta shigar da sabbin tuhume-tuhume kan almundahana a kan tsohon gwamnan jihar Dr. Abdullahi Ganduje.

Shugaban Hukumar, Muhuyi Magaji ne ya bayyana hakan a shirin da yayi a wani gidan talabijin mai zaman kasa a ranar Talata, inda ya zargi gwamnatin Ganduje da karkatar da kudaden al’umma.

Ya bayyana cewa, bincike ya nuna yadda aka karkatar da naira biliyan hamsin da dayada miliyan dari uku  na kudaden kananan hukumomi zuwa wasu asusun ajiya da basu da hurumin karbar irin wadannan kudaden.

A cewar Muhuyi, gwamnatin Ganduje na cire naira biliyan 1 a duk wata daga asusun jihar ba bisa ka’ida ba.

Ya kuma yi ikirarin cewa, an zuba Naira biliyan 4 ga asusun wani kamfanin noma daga asusun tattara harajin jihar ba tare da wani dalili ba.