Daliban Jihar Kebbi Da Ke Kasashen Waje Za Su Sami Tallafin Naira Miliyan 309

Gwamnatin jihar Kebbi, ta amince da kashe sama da Naira miliyan Dari Uku da Tara, domin biyan tallafin karatu na kasashen waje ga ‘yan asalin jihar da ke karatu a Indiya da Masar.

Wata sanarwa da mai magana da yawun gwamnan jihar Ahmed Idris ya rabawa manema labarai, ta ce  kwamishinan ilimi mai zurfi na jihar Alhaji isah Abubakar-Tunga ne ya bayyana hakan a ofishinsa.

Kwamishinan ya ce za a bada Naira miliyan 228 ga dalibai 63 da ke karatu a Indiya, yayin da daliban da ke Kasar Masar za su sami Naira miliyan 81 da dubu 400.

“Haka kuma nan ba da dadewa ba za a bada irin wannan tallafin ga sauran daliban da ke  kasashen waje su 50.”

Ya bayyana cewa, a watan Fabrairun 2024, jihar ta biya dukkan daliban jihar da ke karatu a manyan makarantun da ke  fadin Najeriya tallafin karatu.

Abdullahi Tukur