Tsarin Kundin Shirin Bunkasa Samarda Abinci Mai Gina Jiki

Majalisar Kasa Kan Abinci da Gina Jiki, wacce Mataimakin Shugaban Kasa Kashim Shettima ke jagoranta, ta kafa wani kwamiti na Musamman Kan Kudi domin tsara tsarin samun kudade mai dorewa ga shirye-shiryen abinci mai gina jiki a fadin Najeriya.

An kafa wannan kwamiti ne a yayin wani taron yanar gizo na Majalisar, inda ake sa ran zai gabatar da taswirar tsarin kudi cikin kwanaki 30 ga NCN da kuma Majalisar Tattalin Arzikin Kasa domin nazari da amincewa.

Kwamiti, wanda Ministan Lafiya da Walwalar Jama’a, Farfesa Muhammad Ali Pate, ke jagoranta, ya kunshi Ministocin Ilimi, Harkokin Ruwa, Harkokin Mata, da Kimiyya da Fasaha, tare da Mataimakin Babban Sakataren Fadar Shugaban Kasa da Babban Mataimakin Musamman kan Lafiya.

Ma’aikatar Kasafi da Shirye-shiryen Tattalin Arziki za ta kasance sakatariya ta wannan kwamitim.

Mataimakin Shugaban Kasa, Shettima, ya jaddada bukatar ajiyar kudade na musamman domin shirye-shiryen abinci da gina jiki, don tabbatar da cewa kudaden da aka ware a kasafin kudi suna haifar da ingantattun canje-canje a rayuwar ‘yan Najeriya.

Ya kuma yi kira da a gaggauta wucewa da Dokar Abinci da Gina Jiki ta Kasa domin samar da tsarin doka da na hukuma mai karfi na hadin kai, samun kudade da kuma alhakin gudanarwa a fadin sassa daban-daban.

Mataimakin Shugaban Kasa ya bukaci Ma’aikatun, Sassa da Hukumomi su tabbatar cewa kudaden da aka amince da su don shirye-shiryen abinci da gina jiki ana sakin su kuma ana amfani da su yadda ya kamata.

Haka kuma, ya karfafa gwamnatocin jihohi su gaggauta aiwatar da shirin domin magance gibin ayyuka a jihohin da ke fama da karancin abinci mai gina jiki.

Bello Wakili