Gwamnatin Borno Ta Samar Da Gidaje Sama Da 400 Ga ‘Yan Gudun Hijira A Dalori

Gwamnatin Jihar Borno ta fara rabon gidaje 447 na sake tsugunar da ‘yan gudun hijira a yankin Dalori dake karamar hukumar Konduga a jihar.

Gwamna Babagana Zulum wanda ya kaddamar da atisayen, ya kuma raba kayan abinci da sauran kayayyakin masarufi ga iyalan da rikicin Boko Haram ya raba da gidajensu.

Ya ce an zabo wadanda suka ci gajiyar tallafin ne daga sansanin ‘yan gudun hijira da ke Kawar Maila, inda iyalai 197 suka sami gidaje, yayin da iyalai 250 daga sansanin Dalori suka amfana.

Ya ce an samar wa al’ummar da aka sake tsugunar da su asibiti da makaranta da  ruwan sha.

Gwamnan ya ba da tabbacin cewa gwamnatinsa za ta kuma samar da kayayyakin noma da  tallafa ga ‘yan kasuwa domin ‘yan gudun hijirar da suka dawo su samu saukin ababen more rayuwa.

“Kowanne daga cikin gidajen 447, wadanda  suka kunshi mutane kusan dubu biyu da dari biyar  sun sami kayan abinci, da  tabarmi, da barguna da tufafi.” In ji Gwamna Zulum.

Zulum ya kuma yi tsokaci kan shirin sake ginawa da kuma tsugunar da al’ummar Dalwa da Sandiya da ‘yan ta’addan Boko Haram suka raba da muhallansu a karamar hukumar Konduga.

Hakazalika, Gwamna Babagana Zulum ya kuma bayar da umarnin rufe dukkan sansanonin ‘yan gudun hijira da ba  hukuma  ta kafa su ba  a Maiduguri, babban birnin jihar Borno.

Ya ce ba za a ci gaba da ajiye mutane a sansanoni ba, yana mai jaddada cewa za a rufe dukkan sansanoni da ke Maiduguri kafin ranar 29 ga Mayun 2024.

“Muna so a sami kamulallun  mutane  a cikin al’ummoma daban-daban domin bayar da gudummawar ci gaban jihar, don haka za mu mayar da su gidajensu domin su ci gaba da gudanar da al’amuran su na yau da kullun”. Inji  shi.

Gwamnan ya bayyana cewa an rufe dukkanin sansanonin ‘yan gudun hijira da gwamnati ta kafa a birnin Maiduguri da kewaye tun shekarar da ta gabata.

Daga Dauda Iliya