Amurka Ta Dakatar Da Kudurin Kai Jirgin Bama-Bamai Zuwa Isra’ila

Sakatare janar na Majalisar dinkin duniya Antoni Guterese ya ce babban kuskure ne mamayar da israila ta kai Rafah, la’akari da cewa an kasa amfani da hanyoyin da aka saba bi wajen isar da kayakin agaji, haka ma tuni aka rufe hanyoyi 2 mafi sauki da a ke bi dan shigar da kayayyaki cikin Gaza.

A jiya Talata ne rahotanni suka bayyana cewa bangarorin da ke rikici da juna sun amince da komawa kan teburin sulhu, domin tattauna batun tsagaita wuta tare da kawo karshen yakin na Israila da Hamas.

Rundunar sojin Israila ta ce tun da sanyin safiyar ranar Talata ne dakarunta suka kwace ikon kan iyakar mashigin Rafah bayan hare haren sama da suka shafe tsawon lokaci suna yi, wanda yayi sanadiyar mutuwar akalla mutane 27.

Ita ma Hukumar kare hakkin dan Adam ta Human Rights Watch, ta ce a kowace rana Falasdinawa da dama na fuskantar barazanar rasa rayukansu saboda hana kayayyakin agaji shiga inda suke da Israila ta yi.

Akalla Falasdinawa dubu talatin da hudu da  dari bakwai da tamanin da tara ne sojojin Israila suka kashe tun bayan barkewar yaki a cikin watan Oktoban shekarar 2023 yayin da wasu dubu saba’in da takwas da dari biyu da hudu suka jikkata.