Amurka ta Buɗe ƙofa ga Yiwuwar Samar da ƙasar Falasɗinu

Donald Trump na Amurka. REUTERS – Kevin Lamarque

Kwamitin sulhu na Majalisar Ɗinkin Duniya zai yi wani zama a Litinin mai zuwa don baiwa mambobinsa damar kaɗa ƙuri’a kan ƙudirin shugaba Donald Trump na Amurka game da shirin zaman lafiyar Gaza, bayan gyara a daftarin da a yanzu ya buɗe ƙofa ga yiwuwar samar da ƙasar falasɗinu bisa sahalewar Amurka saɓanin a baya.

A makon jiya ne Amurka ta cimma jituwa da mambobin kwamitin 15 game da daftarin da ya biyo bayan yarjejeniyar kawo ƙarshen yaƙin na shekaru 2 tsakanin Isra’ila da Hamas.

Daftarin wanda kamfanin dillancin labarai na AFP ya gani ya amince da kafa majalisar ƙolin zaman lafiya ga yankin na Gaza wanda Trump zai jagoranta har zuwa ƙarshen shekarar 2027.

Ƙarƙashin wannan daftari akwai shirin nan na zamar da dakarun wanzar da zaman lafiya a Gazan da aka kira ISF wanda za su yi aiki kafaɗa da kafaɗa da ƙasashen Masar da kuma Isra’ila baya ga horar da ƴansandan Falasɗinu don bayar da tsaro ga iyakokin Zirin na Gaza.

Saɓanin wancan daftarin da ya gabata, a cikin wannan sabon daftarin akwai yiwuwar samar da halastacciyar ƙasar Falasɗinu, bayan gyaran da Amurkan ta yiwa ƙudirin nata, kodayake akwai shakku kan yiwuwar tarin sharuɗɗa su biyo baya, lura da yadda gwamnatin Amurka ke adawa da ƴancin Falasɗinawa.

Bayanai sun ce Amurka da tarin ƙasashen Larabawa da masu rinjayen musulmi ciki har da Masar da Saudi Arabia da Qatar da Haɗaɗɗiyar Daular Larabawa baya ga Turkiya da Pakistan da Jordan da Indonesia sun yi kira ga kwamitin da ya gaggauta zama don amincewa da wannan sabon daftari.

Cikin wata sanatawar da waɗannan ƙasashe suka fitar sun buƙaci zama na musamman kan ƙudirin a Litinin mai zuwa don amincewa da shi nan take, kodayake wasu bayanai sun ce Rasha ta gabatar da nata ƙudirin da ke cin karo da buƙatar Amurka.

Cikin ƙudirin na Rasha ta yi maraba da ƙoƙarin da ya kai ga tsagaita wuta a Gaza duk da cewa bata ambaci sunan Donald Trump a matsayin jagoran nasarar ba, sai dai bata amince da girke dakaru a Gaza ba.

Amurka ta yi gargaɗin cewa rashin amincewa da ƙudirinta kai tsaye na nufin dawo da yaƙi a Gaza da nufin kakkaɓe ilahirin mayaƙan Hamas.