Gwamna Kefas Na Taraba Ya Karbi Katin Jam’iyyar APC

Daga Jamila Abba 

Gwamnan Jihar Taraba, Dakta Agbu Kefas, ya karɓi katin shaidar zama dan jam’iyyar APC a hukumance, wanda hakan ya tabbatar da cikakken rajistarsa cikin jam’iyyar.

An mika katin membobinsa na APC ga Gwamnan ne ta hannun Shugaban APC a gundumar Asibiti (Hospital Ward) da ke Karamar Hukumar Wukari, Honarabul Umaru Tanko ne ya mika katin zama mamban na APC ga Gwamna Kefas a gidan TY Danjuma da ke Jalingo.

Da yake jawabi a ofishinsa bayan karɓar katin, Gwamna Kefas ya bayyana cewa rajistarsa ta tabbatar da matsayinsa a hukumance a matsayin cikakken mamba na APC, wanda hakan zai ba shi damar shiga dukkan harkokin jam’iyyar.

Ya ƙara da cewa nan ba da jimawa ba za a yi bikin sauya sheƙarsa zuwa jam’iyyar ta APC.

A yayin mika katin, Honarabul Umaru Tanko ya bayyana Gwamnan a matsayin cikakken mamba na APC tare da nuna farin cikin jam’iyyar na maraba da shi a hukumance.

Haka kuma, Kwamishinar yada Labarai da Wayar da Kai ta Jihar, Barista Zainab Usman Jalingo, ta tabbatar da cewa yanzu Gwamna Kefas cikakken mamba ne na APC a Jihar Taraba.