Zaben 2027: Dattawan APC a Jigawa Sun Bayyana Goyon Baya ga Tinubu da Umar Namadi

Daga Usman Muhammad Zaria 

Kwamitin Dattawan jam’iyar APC a Jihar Jigawa ya amince da Bola Ahmed Tinubu da Umar Namadi a matsayin ’yan takarar jam’iyar a zaɓen 2027.

An cimma wannan matsaya ne a wani taro da ya haɗa manyan masu ruwa da tsaki na jam’iyyar daga matakai daban-daban.

Shugaban APC na jihar, Ahmed Garba MK, ya ce an ɗauki matakin ne bayan dogon nazari.

Ya bayyana cewa sun amince da Tinubu a matsayin ɗan takarar shugaban ƙasa, yayin da aka amince da Namadi a matsayin ɗan takarar gwamna.

Ya ƙara da cewa kwamitin dattawa zai ɗauki nauyin sayen fom ɗin takara ga dukkansu.

Jam’iyyar ta kuma zaɓi tsarin sulhu  maimakon zaɓen fidda gwani domin zaɓar ’yan takara.

Domin aiwatar da wannan tsari, an amince da kafa kwamitoci a matakin jiha da ƙananan hukumomi.

Kwamitocin za su tabbatar da tantance duk masu neman takara kafin fitar da ɗan takara guda daya a kowanne muƙami.

Hakazalika wakilan yankunan majalisar dattawa uku sun bayyana cikakken goyon bayansu ga wannan matsaya.

Dattawan jam’iyyar sun bayyana amincewar a matsayin wadda aka yi gaba ɗaya ba tare da wani sabani ba.