Jam’iyyar ADC A Katsina Ta Zaɓi Sabbin Shugabanni

Jam’iyyar ADC reshen jihar Katsina ta zaɓi sabbin shugabanninta, inda aka zaɓi Alhaji Mohammed Rimi a matsayin shugaban jam’iyyar na jihar, sai Mansur Mu’azu a matsayin mataimaki, Mukhtar Adahama a matsayin sakatare, yayin da Amina Lawal ta zama shugabar mata.

An zaɓi shugabannin ne yayin taron babban zaɓen shugabannin jam’iyyar na jihar, wanda ya haɗa masu ruwa da tsaki da wakilai daga mazaɓu 361 da shugabannin jam’iyya daga matakan jiha da ƙananan hukumomi, tare da wakilai daga hedikwatar jam’iyyar ta ƙasa.

A yayin rantsar da sabbin shugabannin, jigo a jam’iyyar, Mustapha Inuwa, ya gargaɗi mambobin jam’iyyar da su yi taka-tsantsan da masu neman haddasa rikici a cikin jam’iyyar gabanin zaɓen 2027.

Ya buƙaci mambobin jam’iyyar da su kasance masu haƙuri da biyayya tare da mayar da hankali wajen ƙarfafa tubalin jam’iyyar, yana mai cewa al’umma na ƙara nuna goyon baya ga jam’iyyar.

Haka kuma ya buƙaci hukumar zabe ta kasa da ɓangaren shari’a su tsaya tsayin daka wajen kare ‘yancin kai da tabbatar da bin doka domin dorewar dimokuraɗiyya.

Wakilin hedikwatar jam’iyyar ta ƙasa, Lawal Batagarawa, ya yaba da yadda aka gudanar da zaɓen cikin adalci, sannan ya roƙi mambobi da su fifita muradun jam’iyya fiye da na kansu domin samun haɗin kai.

Tun da farko, shugaban kwamitin zaɓe, Babangida Talau, ya bayyana cewa an yi amfani da tsarin sasanci wajen zaɓen shugabannin, kamar yadda dokokin zaɓe suka tanada, tare da raba muƙamai bisa daidaito tsakanin yankunan sanatoci uku na jihar.

Sauran jiga-jigan jam’iyyar sun buƙaci sabbin shugabannin da su sake farfaɗo da jam’iyyar tare da ƙarfafa ta a matakin ƙasa domin samun nasara a zaɓen 2027.

Isma’ila Adamu/Katsina