Gwamnatin Tarayya Na Shirin Kaddamar Da Sababbin Shirye-Shiryen Rage Talauci A Najeriya

Gwamnatin Tarayyar Nigeria ta bayyana aniyarta na ƙaddamar da wani sabon shiri na kyauta da zai taimaka wajen fitar da ‘yan ƙasa daga talauci cikin tsari mai ɗorewa.

Ministan Harkokin Jin-ƙai da Rage Talauci, Dr Bernard Doro, ne ya bayyana haka yayin wani taron tattaunawa da masu ruwa da tsaki da kuma waɗanda suka ci gajiyar shirin tallafin kuɗi na HOPE-CT, wanda aka gudanar a Ilorin, babban birnin jihar Kwara.

Ya ce manufar shirin ita ce tantance yadda tallafin gwamnati ke kawo sauyi a rayuwar gidaje marasa galihu. A cewarsa, a ƙarƙashin shirin HOPE-CT, jihar Kwara ta samu kusan naira miliyan 13.7, yana mai bayyana jihar a matsayin abar koyi wajen aiwatar da shirin.

Ministan ya yaba da yadda shirin ya kai ga al’umma a matakai daban-daban, tare da jinjinawa gwamnan jihar AbdulRahman AbdulRazaq kan jagoranci da kulawar da yake bai wa walwalar jama’a.

A nata jawabin, Kwamishiniyar Jin-ƙai da Ci Gaban Jama’a ta jihar, Dr Mariam Nnafatima Imam, ta ce shirin ya zo a kan lokaci kuma ya yi tasiri matuƙa.

Ta bayyana cewa sama da gidaje dubu 183 ne suka amfana da tallafin a matakai uku na farko a dukkan ƙananan hukumomi 16 na jihar.

Ta ƙara da cewa shirin ya yi daidai da manufofin gwamnatin jihar wajen tallafa wa marayu da yara marasa galihu da masu nakasa da tsofaffi da sauran marasa ƙarfi, tare da inganta cibiyoyin kula da yara.

Wasu daga cikin waɗanda suka ci gajiyar tallafin naira dubu 75,000, sun ce sun saka kuɗin ne cikin sana’o’in sayar da POP da gawayi, tare da gode wa gwamnatin tarayya bisa tallafin da ta bayar.

Sun kuma roƙi gwamnati da ta faɗaɗa shirin domin ƙarin mutane su samu damar cin gajiyarsa.

Muhammad Rabiu/Kwara