Dan Takarar Gwamna Na ADC Ya Yi Alƙawarin Karfafa Mata Da Shugabanci Mai Haɗa Kai A Zamfara

Wani mai neman takarar gwamna a ƙarƙashin jam’iyyar ADC a jihar Zamfara State, Dr. Abdulmuddalib Muhammad Auwal Gusau, ya bayyana shirinsa na ƙarfafa mata da samar da shugabanci mai adalci da haɗa kowa da kowa gabanin zaɓe mai zuwa.

Dr. Abdulmuddalib, wanda malamin addinin Musulunci ne kuma ya shiga jam’iyyar kwanan nan, ya bayyana hakan ne yayin ganawa da ƙungiyoyin mata, inda ya jaddada muhimmancin tallafa wa mata domin su taka rawa wajen bunƙasa tattalin arziki da ci gaban al’umma.

Ya yi alƙawarin cewa idan aka zaɓe shi, gwamnatinsa za ta mayar da hankali wajen bai wa mata tallafin kuɗi da jarin fara sana’o’i, musamman masu ƙananan da matsakaitan sana’o’i, domin ƙarfafa sana’o’insu da bunƙasa harkokin kasuwanci a faɗin jihar.

Haka kuma ya ce gwamnatinsa za ta samar da ayyukan yi masu ɗorewa ga mata ta hanyar shirye-shiryen horar da sana’o’i da koyar da dabarun dogaro da kai, domin su kasance masu ba da gudunmawa ga tattalin arzikin jihar.

Dangane da shugabanci mai haɗa kai, ya yi alƙawarin bai wa mata kashi 35 cikin 100 na manyan muƙaman siyasa da na gudanarwa, yayin da sauran muƙaman za a raba su cikin adalci ga matasa da tsofaffi domin samar da wakilci mai daidaito.

Dan takarar ya ce mata na daga cikin rukuni mafi tasiri a cikin al’umma, yana mai cewa idan aka ba su damar da ta dace, za su iya kawo sauyi mai ma’ana ga iyalai da al’umma baki ɗaya.

Ya kuma buƙaci al’ummar jihar Zamfara su mara wa manufofi da shugabanci da ke fifita haɗin kai, ƙarfafa tattalin arziki da ci gaba mai ɗorewa baya.

A yayin taron, ya raba mayafai ga mata a matsayin wata alama ta jajircewarsa wajen inganta walwala da tabbatar da shigar mata a harkokin shugabanci.

Aminu Dalhatu/Gusau