EFS Ta Tallafa wa Zawarawa Da Masu Karamin Karfi Sama Da 100 A Taraba

Wata cibiyar kasuwanci ta yanar gizo da ke da hedikwata a Amurka, mai suna EFS, ta tallafa wa sama da zawarawa da masu ƙaramin ƙarfi 100 a yankin Shavoh da ke ƙaramar hukumar Jalingo a jihar Taraba, inda ta raba musu kayan masarufi a taron agajinta na biyu da aka gudanar a Jalingo.

Mai kula da harkokin EFS a jihar, Ambassador Boniface Koson, ya ce cibiyar ce ta ɗauki nauyin shirin gaba ɗaya a matsayin wani ɓangare na ƙoƙarinta na ayyukan jin ƙai da bunƙasa al’umma.

Ya bayyana cewa an zaɓi waɗanda suka ci gajiyar tallafin ne ta hanyar haɗin gwiwar membobin EFS da coci-coci da masallatai da kuma al’ummar yankin, domin tabbatar da cewa tallafin ya isa ga masu buƙata na gaskiya.

Koson ya ƙara da cewa an kafa EFS a Amurka a shekarar 2019, sannan ta fara aiki a Nigeria a 2023, kuma an yi mata rajista a hukumomin kula da kamfanonin ta Kasa (CAC) da kuma hukumar yaki da safarar kudade ba bisa ka’ida ba (Special Control Unit against Money Laundering) a watan Janairun 2026.

Ya ce wannan shiri ya nuna cewa EFS ba wai tana mayar da hankali ne kawai kan bunƙasa tattalin arziki ba, har ma tana da burin inganta rayuwar al’umma ta hanyar tallafi kai tsaye.

A yayin shirin, an raba kayan masarufi kamar su kayan yaji, sabulu, taliya da gishiri ga waɗanda suka amfana, a wani yunƙuri na tallafa wa marasa galihu a cikin al’umma.

Jamila Abba/Jalingo