Shugaban Gidan Talabijin Na Katsina Abba Zayyan Ya Yi Murabus

Daga Isma’il Adamu 

Babban Manajan gidan talabijin na Jihar Katsina (KTTV), Abba Zayyan, ya miƙa takardar murabus daga muƙaminsa a hukumance.

Takardar murabus ɗin tasa, mai ɗauke da kwanan watan 2 ga Nuwamba, 2026, an aika ta ne zuwa ga Sakataren Gwamnatin Jihar Katsina.

Kwararren ɗan jaridar, wanda ya ce ya yi murabus ne saboda wasu dalilai na kansa, ya gode wa Gwamna Dikko Umar Radda bisa amincewar da ya yi da shi domin yi wa jihar hidima a wannan matsayi cikin shekaru uku da suka gabata.

A cikin takardar, Zayyan ya ce murabus ɗin nasa zai fara aiki ne daga ranar 16 ga Nuwamba, 2026.

Ya bayyana cewa bayan shafe shekaru uku yana aiki a matsayin Babban Manajan KTTV, tun daga Nuwamba 2023 zuwa yanzu, ya yanke shawarar ajiye muƙamin domin wasu dalilai na kansa da kuma neman wasu damarmaki.

Ofishin Sakataren Gwamnatin Jihar Katsina ya karɓi takardar a ranar 6 ga Nuwamba, 2026.

Sai dai a wani rahoto na daban, an fitar da sanarwa ga  manema labarai da ke bayyana cewa an sauke Abba Zayyan daga muƙaminsa, wadda aka sanya wa hannu a ranar 10 ga Nuwamba, kwanaki huɗu bayan ofishin Sakataren Gwamnatin jihar ya karɓi takardar murabus ɗinsa.

Abba Zayyan ya samu nasarori a harkar yaɗa labarai, inda ya taɓa riƙe muƙamin Shugaban Gidajen Rediyon Tarayya Kaduna (FRCN), Daraktan Sashen Watsa Shirye-shirye Kai Tsaye a Hedikwatar FRCN da ke Abuja, da kuma Babban Daraktan Hukumar Yaɗa Labarai ta Jihar Kaduna (KSMC).

Ya kuma riƙe wasu muhimman muƙamai a fannonin kafafen yaɗa labarai, hulɗa da jama’a da gudanarwa.

Fassara: Safiyah Abdulkadir