An Yi wa Yara Sama da 66,000 Rigakafin Cutar Shan Inna a Tarauni

Daga Khadijah Aliyu

Yara kimanin 66,446 ne  aka yi wa rigakafin cutar shan inna wato polio, a  Karamar Hukumar Tarauni, wanda hakan ya zama babbar nasara a ƙoƙarin da ake yi na kawar da cutar baki ɗaya.

Mai kula da harkokin lafiya na matakin farko a yankin, Muktar Datti Gwarzo, ya danganta wannan nasara da goyon bayan al’umma da haɗin gwiwar masu ruwa da tsaki.

Ya bayyana cewa jajircewar shugabannin gargajiya, ma’aikatan lafiya, da shugabannin ƙaramar hukuma ya taka muhimmiyar rawa wajen tabbatar da cewa an yi wa dukkan yaran da suka cancanta wannan rigakafi.

Gwarzo ya ƙara da cewa za a ci gaba da ƙarfafa wayar da kan jama’a domin ilmantar da su muhimmancin yin rigakafi a kai a kai, da nufin kawar da cutar polio gaba ɗaya a yankin.

Shi ma da yake jawabi, mai wayar da kan jama’a kan harkokin lafiya, Musa Abdullahi Shamakawa, ya yaba da ƙwazon ma’aikatan lafiya da sarakunan gargajiya wajen wayar da kan iyaye kan amfanin rigakafi.

A nasa bangaren, Daraktan kula da ma’aikata na ƙaramar hukuma kuma Shugaban Ƙungiyar Daraktocin Ƙananan Hukumomi 44, Tijjani Madaki Gulya, ya buƙaci iyaye da masu kula da yara da su ci gaba da goyon bayan shirye-shiryen rigakafi domin kare lafiyar yara da al’umma baki ɗaya.

Ya jaddada cewa ci gaba da shiga irin waɗannan shirye-shirye yana da matuƙar muhimmanci wajen hana yaduwar cututtukan da za a iya rigakafinsu.